काठमाडौं । प्रतिनिधिसभा सदस्य निर्वाचनको मतगणना सकिँदै जाँदा देशका विभिन्न निर्वाचन क्षेत्रमा धेरै उम्मेदवारले जमानत जोगाउन सकेनन्। निर्वाचन ऐन अनुसार कुल सदर मतको १० प्रतिशत मत ल्याउन नसक्ने उम्मेदवारको जमानत जफत हुन्छ। यसपटकको निर्वाचनमा पुराना र साना दलका धेरै उम्मेदवारले यो ‘थ्रेसहोल्ड’ पार गर्न सकेनन्। मत परिणाम सार्वजनिक हुँदै जाँदा विभिन्न जिल्लामा ठूला दलदेखि साना दलसम्मका उम्मेदवारको जमानत जफत भएको देखिएको छ।
कहाँ–कहाँ जफत भयो जमानत ?
काठमाडौं क्षेत्र नम्बर १ मा एमाले, नेकपा लगायत २६ उम्मेदवारको जमानत जफत भएको छ। यहाँ २९ उम्मेदवारमध्ये तीन जनाले मात्र जमानत जोगाउन सकेका थिए। त्यस्तै काठमाडौंका १० निर्वाचन क्षेत्रमा २२६ उम्मेदवारको जमानत जफत भएको निर्वाचन कार्यालयले जनाएको छ। एमाले, नेकपा, राष्ट्रिय जनमोर्चा, उज्यालो नेपाल पार्टी, श्रम संस्कृति पार्टी लगायतका उम्मेदवारले आवश्यक मत ल्याउन सकेनन्।
रुपन्देही–३ मा विजयी उम्मेदवार बाहेक ३५ जना उम्मेदवारको जमानत जफत भएको छ। कञ्चनपुर निर्वाचन क्षेत्र नम्बर २ मा प्रतिस्पर्धामा रहेका १९ उम्मेदवारमध्ये १५ जनाको जमानत जफत भएको छ। सुनसरी–२ मा विजयी उम्मेदवारले ठूलो मतान्तर ल्याउँदा पूर्वमन्त्रीसहित २६ उम्मेदवारको जमानत जफत भएको छ। बैतडीमा ७ जना उम्मेदवारको जमानत जफत भएको छ। जफत हुनेमा राप्रपा, माओवादी, जसपा, नेपाल मजदुर किसान पार्टी लगायतका उम्मेदवार छन्। खोटाङमा प्रतिनिधिसभा निर्वाचनपछि ११ जना उम्मेदवारको जमानत जफत भएको छ। सर्लाहीका चार निर्वाचन क्षेत्रमा १५४ उम्मेदवारको जमानत जफत भएको विवरण सार्वजनिक भएको छ। यसमा पूर्वमन्त्री र विभिन्न दलका उम्मेदवार पनि समावेश छन्।
अन्य जिल्लातर्फ :
इलाम – १८ उम्मेदवारको जमानत जफत
कास्की – विभिन्न क्षेत्रमा १२–१४ उम्मेदवारको जमानत जफत
दाङ – ५१ उम्मेदवारको जमानत जफत
ललितपुर – ६३ उम्मेदवारको जमानत जफत
भोजपुर र बागलुङ – केही उम्मेदवारको जमानत जफत
