काठमाडौं । राजनीतिलाई अझै पनि पुरुषप्रधान क्षेत्रका रूपमा बुझ्ने समाजमा एक छोरी मान्छे भएर निस्वार्थ, निडर र निरन्तर रूपमा संगठन निर्माणमा होमिनु आफैँमा असाधारण साहसको विषय हो।
यही साहस, यही प्रतिबद्धता र यही नेतृत्वको उदाहरण हुन् चाँदनी ऐर।
राष्ट्रिय राजनीतिमा उदाएको नयाँ दल राष्ट्रिय स्वतन्त्र पार्टी। नयाँ आशा, नयाँ सोच र नयाँ संस्कृतिको बीउ रोप्ने उद्देश्यले गठन भएको राष्ट्रिय स्वतन्त्र पार्टीको सुरुवाती चरण अत्यन्तै चुनौतीपूर्ण थियो। संरचना थिएन, स्रोत सीमित थिए, विश्वास जित्नु कठिन थियो।
तर यही कठिन समयमा चाँदनी ऐरजस्ता युवाहरूले दिनरात नभनी व्यक्तिगत स्वार्थभन्दा माथि उठेर संगठन निर्माणको जिम्मा आफ्नो काँधमा लिए।
चाँदनी ऐरको योगदान केवल औपचारिक पद वा भाषणमा सीमित रहेन। उनी गाउँबस्ती पुगेकी छन्, युवासँग बसेर राजनीति बुझाएकी छन्, महिलालाई संगठित हुन प्रेरित गरेकी छन् र नयाँ पुस्तामा नेतृत्वको चेतना जगाएकी छन्।
घर, समाज र राजनीतिका बहुआयामिक जिम्मेवारीका बीच पनि उनले कहिल्यै हार मानेकी छैनन्।
एक छोरी मान्छे भएर राजनीति रोज्नु आफैँमा चुनौती हो। आलोचना, अविश्वास, मानसिक दबाब र सामाजिक अवरोधसँग जुध्नुपर्छ। तर चाँदनी ऐरले यी सबैलाई आफ्नो कमजोरी होइन, शक्तिको स्रोत बनाइन्।
उनले देखाएकी छन् कि नेतृत्व लिङ्गले होइन, दृष्टिकोण, इमानदारी र कर्मले तय हुन्छ।
उनको नेतृत्व शैली आक्रामकभन्दा पनि समावेशी छ। सुन्ने क्षमता, सहकार्यमा विश्वास र संगठनप्रति निष्ठा उनको मुख्य पहिचान बनेको छ।
महिलाको सहभागिता बिना लोकतन्त्र अधुरो हुन्छ भन्ने विश्वासलाई उनले व्यवहारमा उतार्ने प्रयास गरेकी छन्।
चाँदनी ऐर केवल एक राजनीतिक कार्यकर्ता मात्र होइनन्, उनी आजका नेपाली महिलाहरूका लागि प्रेरणाको स्रोत हुन्।
उनी भन्छिन्, 'राजनीति पुरुषको मात्र होइन, यो परिवर्तन चाहने सबै सचेत नागरिकको साझा जिम्मेवारी हो।'
यही सोचका कारण उनी युवामाझ लोकप्रिय छिन् र महिलाहरूका बीच परिचित नाम बनेकी छन्।
आज जब नेपाली राजनीतिमा नैतिकता, जवाफदेहिता र साहसी नेतृत्वको खाँचो छ, त्यस्तो समयमा चाँदनी ऐरजस्ता कर्मशील नेतृहरूले सम्भावनाको नयाँ बहसलाई अघि बढाइरहेका छन्। उनको यात्राले देखाउँछ, साहस भए परिवर्तन सम्भव छ र नेतृत्व लिने हिम्मत भए इतिहास लेख्न सकिन्छ।
उनै चाँदनी ऐरले आज राष्ट्रिय स्वतन्त्र पार्टीको महाधिवेशनमा केन्द्रीय सदस्य पदका लागि उम्मेदवारी दिएकी छन्।
