काठमाडौं : सत्ता साझेदार नेपाली कांग्रेस र नेकपा एमालेले उपसभामुख इन्दिरा रानामगरलाई महाअभियोग लगाइ हटाउने प्रयास थालेपछि राजनीतिक माहौल निकै तातेको छ । दुवै पार्टीले हिजोदेखि हस्ताक्षर अभियान थाली रानालाई हटाउने प्रस्ताव अघि सार्ने योजना बनाइसकेका छन् । यद्यपि दुवै पार्टीभित्र रानाविरुद्ध महाअभियोग लगाउने प्रस्ताव सम्बन्धमा नेताहरु दुई खेमामा विभाजित भएका छन् ।
आफ्ना सांसदहरूलाई सिंहदरबार बोलाएर हस्ताक्षर गर्न निर्देशन दिएपछि नेताहरु प्रस्ताव लान हुने वा नहुने भन्ने विषयमा विभाजित भए । एमालेका प्रमुख सचेतक महेश बर्तौलाले उपसभामुख हटाउने प्रस्ताव तत्काल अघि नबढ्ने बताउँछन् भने कांग्रेस महामन्त्री गगन थापाले बहुमत हुँदैमा जे पनि गर्न नपाइने बताउँछन् । उता रास्वपा पार्टीले भने आफ्नो पार्टीबाट प्रतिनिधि सभामा निर्वाचित रानाको पद खोस्न नपाइने तर्क गरिरहेको छ ।
संसदमा समेत खाली कागजमा उपसभामुख विरुद्ध हस्ताक्षण लिने कार्यको राप्रपाले विरोध जनाएको छ ।
उपसभामुख हटाउन हस्ताक्षर संकलनको निर्णय सोमबार साँझ बालुवाटारमा बसेको कांग्रेस–एमाले बैठकबाटै भएको थियो । त्यो बैठकमा कांग्रेस र एमालेका शीर्ष नेता सहभागी थिए । यसै सन्दर्भ आजको भक्सपपमा हामीले आमनागरिकलाई पद अनुकूल आचरण नगरेको भन्दै उपसभामुखलाई हटाउन कांग्रेस एमालेको हस्ताक्षर अभियानलाई के भन्नुहुन्छ भनेर सोधेका छौं । हेरौं उनीहरुको धारणा जस्ताको त्यस्तै :
