काठमाडौं । सुरक्षित खानेपानी, सरसफाइ तथा स्वच्छतामा सुशासन र पैरवीसम्बन्धी दुईदिने तालिम काठमाडौंको पुरानो नैकापमा सम्पन्न भएको छ।
खानेपानी तथा सरसफाइ महिला मञ्च बागमती प्रदेश र मधेश प्रदेशले आयोजना गरेको तालिम खानेपानी तथा सरसफाई उपभोक्ता महासंघ ( फेडवासन) र वाटरएड नेपालको सहयोगमा २०८३ असोज ४र५ गते सञ्चालन गरिएको थियो ।
तालिममा विशेषगरी महिलाहरूको सहभागिता रहेको थियो। सहभागीहरूलाई सुरक्षित खानेपानीको पहुँच, सरसफाइ तथा स्वच्छता, खानेपानी तथा सरसफाइ क्षेत्रमा सुशासन, नागरिकको भूमिका तथा अधिकार र प्रभावकारी पैरवीका विषयमा जानकारी तथा सीप प्रदान गरिएको आयोजकले जनाएको छ।
तालिमले खानेपानी, सरसफाइ तथा स्वच्छताको क्षेत्रमा महिलाको अर्थपूर्ण सहभागिता र नेतृत्व अभिवृद्धि गर्नुका साथै स्थानीय तह तथा सम्बन्धित सरोकारवालासँग प्रभावकारी रूपमा पैरवी गर्न आवश्यक ज्ञान र क्षमता विकासमा सहयोग पुर्याउने अपेक्षा गरिएको छ।
कार्यक्रममा सुरक्षित खानेपानी तथा सरसफाइ सबै नागरिकको आधारभूत आवश्यकता भएकाले यसको सुनिश्चितताका लागि समुदाय, महिला समूह, उपभोक्ता समिति, स्थानीय सरकार तथा अन्य सरोकारवालाबीच सहकार्य आवश्यक रहेकोमा जोड दिइएको थियो।
खानेपानी, सरसफाइ तथा स्वच्छताका सवालमा महिलाको सहभागिता र नेतृत्व बढाउँदै समुदायस्तरबाटै आवाज उठाउन तथा सरोकारवाला निकायलाई जवाफदेही बनाउन तालिम महत्वपूर्ण रहेको सहभागीहरूले बताएका थिए।
'सुरक्षित खानेपानी तथा सरसफाइ, सबैका लागि' भन्ने मूल भावनालाई आत्मसात् गर्दै सम्पन्न तालिमले खानेपानी तथा सरसफाइका क्षेत्रमा सुशासन र प्रभावकारी पैरवीका लागि महिलाको भूमिका थप सशक्त बनाउने विश्वास आयोजकले व्यक्त गरेको छ।
